पोखरा। राष्ट्रिय गौरवको आयोजना पोखरा क्षेत्रीय अन्तर्राष्ट्रिय विमानस्थल निर्माणका लागि विष्फोटन गराउँदा आसपासमा रहेका एक दर्जन भन्दा बढी स्थानीयका घरहरू चर्किएपछि पीडित स्थानीयहरू आन्दोलित भएका छन् । 

पोखरा महानगरपालिका वडा नं. १४, हवेली मार्गका स्थानीयहरू नारा जुलुससहित आन्दोलनमा उत्रिएका हुन् । विमानस्थल निर्माणका क्रममा कडा खालका चट्टानहरू विष्फोट गराएर फाल्नुपर्ने भएको र यसरी गर्दा काम छिटो हुने भन्दै आयोजनाले विष्फोट गराएको थियो । विष्फोटका क्रममा स्थानीयका ठूला तथा साना घरहरू चर्किएका हुन् ।

यस विषयमा जनप्रतिनिधिसहित स्थानीयले विमानस्थल निर्माण आयोजनासंग पटक पटक वार्ता गरेको थियो । उनीहरूले विष्फोट नगराई ड्रिल गरेर चट्टान निकाल्न माग गरेका थिए । तर विमानस्थल आयोजना पक्षले स्थानीयको मागलाई वेवास्ता गर्दै विष्फोटन गराउन नछोडेपछि स्थानीयले संघर्ष समिति नै बनाएर आन्दोलन गरेका हुन् ।

घर चर्किएर तनावमा रहेका स्थानीयहरूले आफूहरू विकास विरोधी नभएको तर विमानस्थलका लागि आफूहरूको उठिवास लाग्न नहुने बताएका छन् । उनीहरू घर चर्किएपछि आफूहरू निकै तनावमा रहेको बताएका छन् । 

स्थानीय मोहन गिरीले विमानस्थलका लागि विष्फोट गराउँदा आफूहरूको मानसिक रुपमा समेत समस्या परेको भन्दै आक्रोश व्यक्त गरे । उनले विष्फोटनको विकल्प रोज्न जिल्ला प्रशासन, वडा कार्यालय र आयोजना प्रमुखसंग पटक पटक संवाद र छलफल गरे पनि वेवास्ता गरिएको बताए । 

अर्का स्थानीय मिनु कंडेल लामिछानेले विष्फोटन नगर्नुस्, विकल्प खोज्नुस भन्दा पनि विमानस्थल पक्षले नटेरेको बताइन् । एकैपटक धेरै मात्रामा विष्फोट गराउँदा आफूहरूको घर कामै नलाग्ने अवस्थामा पुग्न लागेको बताइन् । 

पोखरा महानगरपालिका वडा नं. १४ का जनप्रतिनिधि जितेन्द्रजंग थापाले विमानस्थलको चट्टान ब्रेकरले पनि फुटाउन सक्ने भन्दै विष्फोटको विकल्प खोज्नुपर्ने बताए । उनले विष्पोट गराउँदा हुने असरबारे आयोजना पक्षले सोच्नुपर्ने खाँचो औंल्याए । 

यता, विमानस्थल निर्माण आयोजना प्रमुख ईन्जिनियर विनेश मुनंकर्मी भने स्थानीयले भनेजस्तो क्षति हुने गरि विष्फोट नगराइएको बताएका छन् । विमानस्थलमा अझै पनि चार टन विष्फोटक पदार्थ बाँकी रहेको भन्दै उनले आवश्यक परेको ठाउँमामात्र विष्फोट गराएर काम गरिरहेको स्पष्ट पारे । 

यस विषयमा कास्कीका प्रमुख जिल्ला अधिकारी ज्ञानप्रसाद ढकालले आयोजना पक्ष र स्थानीयसंग समन्वय गरिरहेको बताए । उनले विष्फोट गराउँदा स्थानीयको घरमा क्षति भएको भए विमानस्थल आयोजना क्षतिपूर्ति दिनुपर्ने र स्थानीयले काममा अवरोध गर्न नमिल्ने स्पष्ट पारे । 

विमानस्थल निर्माणको काम अहिलेसम्म ६० प्रतिशत सकिएको छ । आगामी २०२१ जुलाईसम्ममा निर्माण कार्य सक्ने लक्ष्य भए पनि लकडाउनका कारण निर्माण सामग्री र कामदारको अभावका कारण यसमा धक्का पुग्ने देखिन्छ ।

हाल विमानस्थल भित्रै रहेका ८५ जना नेपाली र २५० जना चाइनिज कामदारले मात्र काम गरिरहेका छन् । आयोजना निर्माण शुरु भएको छोटो समयमै उल्लेख्य काम भएको विमानस्थलमा सन् २०२० को अन्त्यसम्ममा सबै काम सम्पन्न गरी २०२१ को जुलाईसम्ममा अन्तर्राष्ट्रिय जहाज पोखरामा ल्याण्ड गर्ने लक्ष्य निर्माण कम्पनीको छ ।