राजापुर । बर्दियामा सोमबार एकैदिन १८ जनामा कोरोना संक्रमण पुष्टि भएको छ । नगरपालिका मधुवन र बारबर्दियाका दुईदुई, ठाकुरबाबाका तीन र बाँसगढीका नौ गरी १८ कोरोना संक्रमित थपिएका छन् ।
बारबर्दियामा पहिलो पटक कोरोना संक्रमित हुने श्रीमान् र श्रीमती भएको बताइएको छ । बारबर्दिया –७ रम्मापुरका ३४ वर्षीय र ३३ वर्षीया दम्पतीमा कोरोना संक्रमण पुष्टि भएको नगर प्रमुख दुर्गाबहादुर थारुले बताए ।
सुदूरपश्चिम प्रदेशको गौरीफन्टा नाकाबाट उनीहरु १६ दिनअघि भारतको राजस्थानबाट घर फर्केका थिए ।
उनीहरुलाई क्वारेन्टिनमा राखिएको थियो । कोरोना परीक्षण गरेर घर फर्काउने बेलामा रिपोर्ट पोजेटिभ आएको थियो । संक्रमित दम्पतीलाई जयनगरस्थित आइसोलेशनमा राखिने नगर प्रमुख थारुले जानकारी दिए ।
