एकदलीय अधिनायकवाद लाद्न सरकारले पृष्ठभूमि बनाउँदै गरेको विमलेन्द्र निधीको आरोप
सामाजिक दूरी कायम गर्न नसके विपीको पालाको मोडालिटीमा कांग्रेस महाधिवेशन गर्न सकिने भनाइ
प्रकाशित २०७७ जेठ ३० शुक्रबार
35
Shares
काठमाडौं। नेपाली कांग्रेसका उपसभापति विमलेन्द्र निधीले जनताको पीडामा मल्हम लगाउन नसकेको सरकारले दुःख बुझ्न पनि असफल रहेको बताएका छन् ।
जिपी कोइराला लोकतन्त्र सम्वर्द्धन केन्द्रले गरेको डिजिटल संवाद कार्यक्रममा बोल्दै उपसभापति निधीले भ्रष्टाचार पनि कोरोनाको कालमा ब्यापक भएको बताए ।
कोरोना महामारीलाई व्यवस्थापन गर्दै रोक्न असफल भएको सरकारले भ्रष्टाचार मौलाउन दिएको र संरक्षण गरेको विरोधमा असार २ गते देशभर विरोध कार्यक्रम राखिएको जानकारी दिए ।
एकदलीय अधिनायकवादी संरचना लाद्न सरकारले पृष्ठभूमि बनाइरहेको निधीले बताए ।
कांग्रेसको आगामी महाधिवेशनको बारेमा पनि भएको छलफलमा निधीले महाधिवेशनमार्फत नयाँ नेतृत्व चयनसँगै वैचारिक प्रष्टता पनि राख्नुपर्ने बताए।
‘सामाजिक दूरी कायम गर्दै महाधिवेशन गर्न कति सम्भव छ त्यसमा सल्लाह गरौं’ भन्दै निधीले हैन भने वीपी कोइरालाको पालामा झैं जिल्ला जिल्लाबाटै महाधिवेशनमा मतदान र नीतिगत छलफल गर्ने मोडालिटी बारेमा पनि चर्चा गर्न सकिने बताए ।
नत्र फागुनमा हुने महाधिवेशनलाई ६ महिना पछाडि धकेल्नुको विकल्प नभएको उल्लेख गर्दै उनले यद्यपि यसबारेमा पार्टीमा औपचारिक रुपमा छलफल नभएको बताए ।
