काठमाडौं। २०७७ आषाढ १५ गते प्रतिनिधि सभाको राज्य व्यवस्था तथा सुशासन समितिले पारित गरेको बिधेयकको विरुद्धमा सुरु भएको नासुहरुको आन्दोलन संगठित हुदै अगाडी बढेको छ ।
राजपत्र अनंकित कर्मचारीको वृतिबिकासमा गम्भिर असर पार्ने गरी राज्य व्यवस्था तथा सुशासन समितिले विधेयक पास गर्दै छ भन्ने खवर पाएका केही नासुहरुले मितिः२०७७/०३/१०(2020 june 14) मा फेसबुकमा “निजामती सेवामा नासु बचाउ अभियान” नामक समुह बनाएर कर्मचारीहरुलाई एकत्रित गर्न सुरु गरेका थिए । हाल सो ग्रुपमा ५३०० भन्दा बढि राजपत्र अनंकित कर्मचारीहरु सक्रिय रुपले एकिकृत छन् ।
सो अभियानमा समग्र राजपत्र अनंकित कर्मचारीका मागहरु प्रस्तुत गरिएको तर नाम नासु बचाउ अभियान राख्दा साथिहरुको गुनासो आएपछी सो ग्रुपको नाम “ निजामति सेवामा नासु बचाउ अभियान (राजपत्र अनंकित संरक्षण आन्दोलन)” बनाइएको नासुहरुको आन्दोलनका अभियान्ता श्रीराम पौडेलले जनाए । उनिहरुको आन्दोलन हाल आएर जिल्ला जिल्लामा संगठन विस्तार गर्दै संगठित र एकिकृत तरिकाले अगाडी बढ्न थालेको छ । आजको दिन सम्म लगभग देशभरका आधा जति जिल्लामा सम्पर्क समिति गठन भएका छन् । एक जना संयोजक र अन्य आवश्यक संख्यामा सदस्य राखेर जिल्ला सम्पर्क समितिहरु गठन गरिएका छन् ।
सो ग्रुपबाटै आव्हान गरेर देहायका ६ माग पूरा गर्न देशभरीबाट कर्मचारीहरुको हस्ताक्षर संकलनको काम सम्पन्न भएको छ ।
रा.प. तृतीय श्रेणी शाखा अधिकृत सरहको पदपूर्तिमा ५० प्रतिशत खुल्ला, ३० प्रतिशत बढुवा र २० प्रतिशतमा आन्तरिक/अन्तरतह प्रतिस्पर्धा को व्यवस्था हुनुपर्ने, तर कुनै पनि साविकको पदबाट अधिकतम १२ बर्षसम्म पनि बढुवा नभएमा स्वतः बढुवा प्रणालीबाट पदपूर्ति गरेर मात्र खुलातर्फ विज्ञापन गर्नुपर्ने।
निजामती सेवामा प्रवेश गरिसकेका कर्मचारीलाई निजामती सेवाको पदपूर्ति हुने कुनै पनि परिक्षामा भाग लिन उमेर हद नलाग्ने र कुनै पनि निजामती कर्मचारीले खुल्ला प्रतिस्पर्धाबाट लोकसेवा आयोगको परीक्षा उत्तीर्ण गरेमा अघिल्लो पदको सेवा अवधिसमेत जोड्न पाउने विद्यमान निजामती सेवा ऐन, २०४९ को व्यवस्था कायम हुनुपर्ने।
रा.प. प्रथम र रा.प. द्वितीय श्रेणीको खुल्लामा प्रतिस्पर्धा गर्न सम्बन्धित पदको लागि आवश्यक न्यूनतम शैक्षिक योग्यता भएको र निजामती सेवाको राजपत्र अनंकित पदमा रहेर ७ र ५ वर्ष काम गरेको भए योग्य हुन पाउनुपर्ने
सबै सेवा/समूहका कर्मचारीहरुलाई सम्बधित सेवा/समूहमा नै बढुवालगायतका वृत्ति विकासको व्यवस्था गर्ने, अर्को सेवा/समूहलाई प्रभाव पर्ने गरी सेवा/समूह परिवर्तन गर्न नपाउने व्यवस्था मिलाउने,
सबै तहमा श्रेणीगत वा तहगत समान ब्यवस्था हुनुपर्ने,
सरुवा प्रणाली चक्रीय र पूर्वानुमान योग्य हुनुपर्ने ।
प्रधानमन्त्री वा सामान्य प्रशासन मन्त्रीलाई सो हस्ताक्षर बुझाउने कार्यक्रम रहेको निज श्रीराम पौडेलले जनाए ।
निजामती कर्मचारीहरुको आधिकारी ट्रेड युनियन लगायत राष्ट्रिय स्तरका ट्रेड युनियन हरुले २०७७/०३/ १५ मा निकालेको प्रेस विज्ञप्ति लाई नासुहरुकै दवाव पछि उनिहरुका मागहरु समेत समेटेर पुनरावलोकन गरी पुनः २०७७/०३/१७ गते अर्को मागपत्र जारी गरेपछि निजामती कर्मचारीको आधिकारीक ट्रेड युनियन र नासुहरुले मिलेर आन्दोलन गर्दै आइरहेका छन् । तर नासुहरुका सबै मागहरु आधिकारीक ट्रेड युनियनको मागपत्रमा नसमेटिएकोले सबै माग समेट्न सरकारलाई नै दवाव दिने गरी आफ्ना छुट्टै कार्यक्रम पनि गर्दै जाने सो समुहका अगुवा प्रकाश भट्टराईले बताएका छन् ।
२०७७ असार १७ देखी आज सम्म नासुहरु पनि आधिकारी ट्रेड युनियन सँगै मिलेर आन्दोलन गर्दै आएका छन् । आज पनि देशभर “२०७७ असार १५ गते संसदको राज्य व्यवस्था तथा शुसासन समितिबाट संघीय निजामती सेवा विधेयक माथि भएको अलोकतान्त्रीक तथा विभेदकारी निर्णयप्रति मेरो असहमति छ।" नामक पर्चा छातिमा टाँस गरी उनिहरुले कार्यालयमा काम गरेका छन् ।
राजपत्रअनंकित कर्मचारीहरुको माग आउदै गरेको संघीय निजामती सेवा ऐनमा समेट्न दवाव दिन अझै सशक्त ढंगले आन्दोलनलाई अगाडि बढाउन भन्दै कर्मचारी साथिहरुको सुझाव तथा तथ्यांक संकलन गर्न अनलाईन प्रणालीको विकास गरिएको छ । गुगल फर्मबाट सुझाव तथा तथ्यांक संकलन गरी सोही अनुसार आन्दोलनलाई ७७ वटै जिल्लामा संगठित गर्ने उक्त अभियानका एक अभियान्ता श्रीराम पौडेलले जनाए । राजपत्र अनंकित कर्मचारीलाई पेलेर अगाडी बढ्न खोजे जति बेला पनि सशक्त आन्दोलन गर्न कर्मचारीहरु तयार रहने गरी संगठन निर्माण गर्न खोजिएको हो ।
