काठमाडौं । काठमाडौं उपत्यकामा कोरोना भाइरसको संक्रमण तीव्र गतिमा बढिरहेको छ । नपत्याउँदो तरिकाले कोरोनाले काठमाडौं उपत्यकालाई घेरा हालेको छ । 

यसको जालो ७१ स्थानमा फैलिइसकेको छ । बुधबारसम्म उपत्यकामा २ सय ९० जनामा संक्रमण पुष्टि भएका छन् । 

जसमा काठमाडौंका १ सय ९१, ललितपुरका ५६ र भक्तपुरका ४३ जना छन् । मृतक पनि  बढेका छन् । नजानिँदो पाराले उपत्यकालाई कोरोनाले घेरा हाले पनि सरकारले कुनै वास्ता गरेको छैन । 

यतिसम्म कि दुई जना नेपालमा संक्रमित हुँदा चैत ११ गते लकडाउन लगाउने सरकारले अहिले उपत्यकाभित्रै ७१ स्थानमा २९० जना संक्रमित हुँदा लकडाउन झन् खुकुलो पारेर जनजीवन अस्तव्यस्त बनाएको छ । 

सार्वजनिक यातायात नाममात्रले बन्द छन् । सार्वजनिक यातायात नचले पनि निजी गाडीले यात्रु ओसारेका छन् । निजीलाई सबै छुट छ । 

यातायातमा दलाली बढाउने काम निजीले गरेका छन् । नाकामा कुनै रोकटोक छैन । चार पाङग्रेमा दुई जना मात्र राख्न पाउने नियम लगाउने सरकार र त्यसमातहतका प्रहरी प्रशासन लगायतका कर्मचारीले देखेको नदेख्यै गरेर नियमको उल्लंघन गरेका छन् । 

न ट्राभल हिस्ट्री न लक्षण
काठमाडौं उपत्यकामा एकै दिन सबैभन्दा बढी सोमबार (असार २२ गते) थपिएका थिए । त्यो दिन ५४ जना थपिएका थिए । 

त्यसयता दिनानुदिन संक्रमित थपिएका छन् । मंगलबार २८ र बुधबार २३ जना थपिएका थिए । 

थपिएका मध्ये केहीलाई कसरी कोरोना लाग्यो भन्नेसमेत अनुमान लगाउन कठिन छ । 

इपिडिमियोलोजी तथा रोग नियन्त्रण महाशाखाका प्रमुख डा। वासुदेव पाण्डेका अनुसार नेपालमा ९९ प्रतिशत संक्रमित लक्षणविहीन छन् । 

कतिपय संक्रमितको कतै घुमेको रेकर्ड समेत छैन । अनि घरमै बसीबसी समेत संक्रमित भएका छन् । 

यसले स्पष्टै भन्छ कि कोरोना समुदायमा छिरेको छ । टोलटोलमा कोरोना संक्रमण फैलिएको  । 

महाशाखाका अनुसार उपत्यकाका १२ ठाउँका स्थानीयमा ट्राभल हिस्ट्री नै नभएको पाइएको छ । तर पनि कोरोना फैलिएको छ । यतिमात्र हैन उनीहरुको ट्रेसिङ हुने अवस्था नै छैन । 

सरकारको लापरवाही 
त्रिभुवन अन्तर्राष्ट्रिय विमानस्थल आएकाहरु बाहिर निस्केर आफै गाडी खोजेर चढ्छन् । उनीहरु कहाँ जान्छन् के गर्छन् मतलब छैन । 

नाकाबाट दैनिक हजारौं मानिस उपत्यका छिरेका छन् । प्रहरीले केबल कहाँबाट आएको हो र कतिजना हो भनी ड्राइभरको नाम र फोन नम्बर लिएर छाडिदिन्छ । 

निजी गाडीले धमाधम यात्रु ओसार्दा पनि सम्बन्धित निकाय चुप छ । यो चुप बस्ने प्रवृत्तिमा मिलेमतोको गन्ध आइरहेको हुन्छ । त्यसैगरी कुनै पनि चेकिङ छैन । 

मास्कको कथा
गृह मन्त्रालयले गत मंगलबार मास्क नलगाउनेलाई कार्वाही गर्ने भन्यो । तर दुर्भाग्य हजारौंको संख्यामा उपत्यकामा मास्क नलगाई हिँडेका छन् । 

त्यतिमात्र हैन सुरक्षाकर्मीदेखि सरकारी कर्मचारी पनि निष्फिक्री हिँडिरहेका छन् मास्क बिना । 

केही जिल्लामा कार्वाही पनि भएको छ । मास्क नलगाउनेलाई १०० रुपैयाँ जरिबाना गरिएको छ । के कोरोना रोक्न सयले काफी छ ? 

योभन्दा नालायकी अरु के हुन सक्छ ? सरकारले मास्क नभएकालाई निःशुल्क मास्क दिन सक्छ । मास्क बाँड्दै हिँड्नु पर्यो । मास्क किन्ने क्षमता नभएका पनि हुन सक्छन् । 

कोरोनाका नाममा १० अर्ब स्वाहा पारेको महिना बितिसकेको छ । अहिले त्यो रकम अझै कति थपियो होला । के त्यो पैसा भ्रष्टाचार गरेर सक्ने कि जनताको सेवा गरेर सक्ने ? प्रश्नैप्रश्नको घेरामा उभिएको छ केपी शर्मा ओली नेतृत्वको सरकार । 

नेपालमा पहिले ३ रुपैयाँमा पाइने सर्जिकल मास्कलाई अहिले सरकार आफैले ५० रुपैयाँसम्म हालेको बील पनि आएको छ । के भ्रष्टाचार बाहेक यो सरकार अरु केही देख्दैन ? 

सरकारलाई भ्रष्टाचार गर्नकै लागि आएको हो त कोरोना ? 

नियम लगाउने तर त्यसको पालना गर्न स्वयं सरकारी निकाय नै हिच्किचाउँदा भने त्यसले निम्त्याउने स्थिति भयावह हुन सक्छ । 

प्रधानमन्त्री निवास रहेको स्थान बालुवाटारमै कोरोना संक्रमित छन् । राष्ट्रपति निवास भएको स्थान महाराजगञ्जमै कोरोना संक्रमित छन् । तर मतलब किन गरिन्न ? के ठूलालाई कोरोना लागेको छैन ? 

विदेशमा राष्ट्रपति, प्रधानमन्त्रीहरुलाई कोरोना लागिसकेको छ । कोरोनाबाटै मन्त्रीहरु मरेका छन् । के यहाँ सरकार निष्फिक्री छ ? 

उपत्यकामा कहाँ कहाँ छन् संक्रमित ? 
काठमाडौंमा– बालुवाटार, महाराजगञ्ज, धुम्बाराही, बसुन्धारा, तारकेश्वर, सीतापाइला, टोखा, मनमैजु, नैकाप, वनस्थली, सामाखुसी, गल्फुटार, धापासी, बाफल, रानीवन, हाँडीगाउँ, कपुराधारा, कपन, चाबहिल, मैतीदेवी, बागबजार, मरुहिटी, पुरानो बानेश्वर, शंखमूल,  कोटेश्वर, तीनकुने, खुसिबु, कागेश्वरी, मूलपानी, काँडाघारी, गोकर्ण,  साँखु, बौद्ध, ताहाचल, टेकु, कुलेश्वर, कीर्तिपुर,  ट्याङ्लाफाँट, कलंकी, र चन्द्रागिरी । 

ललितपुरमा– कुपन्डोल, पाटन, जाउलाखेल,  ग्वार्को, सानेपा, हात्तीवन, चापागाउँ, भैंसेपाटी, नख्खु, प्युटार, महालक्ष्मी, लुभु, लगनखेल, महालक्ष्मी स्थान, बुङ्मती, ठैब, गोदावरी, सुनाकोठी, धापाखेल, हरिसिद्धि, चौघरे,  गोटीखेल र ठेचो ।

भक्तपुरमा– गठ्ठाघर, सल्लाघारी, दुवाकोट, बागेश्वरी, दूधपाटी, बालकोट, बोडे र भोलाछें । 

नेपालमा संक्रमित
सरकारको तथ्यांक अनुसार नेपालमा संक्रमितको संख्या १६ हजार ४२३ छ । 

त्यसमध्ये ७ हजार ७५२ जनालाई निको भएको छ । ३५ जनाको मृत्यु भइसकेको छ । ती मृतकहरु अधिकांश दीर्घ रोगी रहेका थिए । 

त्यसबाहेक भारतबाट संक्रमित भएर आएका तर क्वारेन्टिन व्यवस्थित नहुँदा उपचारै नपाएर मरेकाहरु पनि छन् । 

सरकारले २ लाख ६६ हजार ४५७ वटा पीसीआर परीक्षण गराएको जनाएको छ ।