काठमाडौं । स्पेनिश लिग ला लिगा फुटबलमा उपाधि दाबेदार बार्सिलोनाको दावेदारी अझै कायमै रहेको छ । उपाधिको घडी नजिक आउँदा कमजोर हुँदै गएको बार्सिलोनाले शनिबार राति भएको खेलमा रियाल भल्लाडोलिडलाई १(० गोल अन्तरले पराजित गर्यो ।
बार्सिलोनाको जितमा अर्टुरो भिडालले खेलको १५ औं मिनेटमा निर्णायक गोल गरे । लियोनल मेस्सीको पासलाई सदुपयोग गर्दै उनले गोल गरेका हुन् ।
मेस्सीले एकै सिजन २० गोल र गोलका लागि २० अस्सिट गर्ने पहिलो खेलाडीको कीर्तिमान बनाएका छन् ।
जितसँगै बार्सिलोनाले लिग लिडर रियाल मड्रिडसँगको अंक दुरी १ मा झारेको छ ।
बार्सिलोनाले ३६ खेलमा ७९ अंक जोडेको छ । एक खेल कम खेलेको रियलको ८० अंक रहेको छ ।
अन्य खेलमा ओसासुनाले सेल्टाभिगोलाई २–१ गोलले तथा एथलेटिको मड्रिडले १–० गोलले हरायो ।
स्पानियोल, लेगानेस र मयोर्का रेलिगेशन क्षेत्रमा रहेका छन् ।
