काठमाडौं। सुनिल थापा सहित राप्रपाका नेताहरुलाई नेपाली कांग्रेसमा प्रवेश गर्नबाट रोक्न राप्रपाका अध्यक्षद्धय कमल थापा र पशुपति शमसेर राणाले गरेको प्रयास असफल भएको छ।
थापा र राणाले आइतबार साँझसम्म पनि सुनिल थापा सहितका नेताहरुसँग कुराकानी गरेका थिए । सुनिलले अब कुनै पनि अवस्थामा पछि हट्न नसक्ने जवाफ फर्काए पछि राणा र कमलले अर्को प्रयाास गरे। थापा समुह भित्रकै केही नेताहरूलाई थापा र राणाले सम्पर्क गरेका थिए । खासगरी मधेसी मूलका नेताहरु बृजलाल यादव सहितका केही नेताहसँग थापा र राणाले छुट्टाछुट्टै सम्पर्क गरेका थिए । त्यो प्रयास पनि असफल भएको छ।
‘नेपाली कांग्रेसमा नजानुहोस, त्यहाँ गए तपाईको भविष्य छैन । बरु तपाईलाई कुन पद चाहिन्छ । मेनेज गरौला भन्ने कुरा आएको हो’ कांग्रेसमा प्रवेश गर्न लागेको एक नेताले भने,‘अब पछि हट्ने अवस्था छैन भनी थापाले जवाफ दिए।’
मंगलवार तीन वजे थापा सहितका नेता कार्यकर्ताहरु नेपाली कांग्रेस पार्टी कार्यालयमा प्रवेश कार्यक्रम राखिएको छ । पार्टी प्रवेश कार्यक्रममा नेपाली कांंग्रेसका सभापति शेरबहादुर देउवा,रामचन्द्र पौडेल,कृष्ण सिटौला लगायतका नेताहरु सहभागी हुनेछन् । झापा जान आँटेका सिटौला पार्टीका प्रवेश कार्यक्रमकोलागि भनि रोकिएका छन्।
स्रोतका अनुसार थापालाई सहमहामन्त्री तथा थापा समुहका ५ जना नेतालाई केन्द्रीय सदस्य तथा दुई जनालाई आमन्त्रित केन्द्रीय सदस्य दिने सहमति भएको छ। ‘सम्भवत आज पार्टी प्रवेश कार्यक्रम मात्र हुने छ । पदाधिकारी तथा केन्द्रीय सदस्यका घोषणा अर्को दिन हुन्छ’स्रोतले भन्यो। बिष्णुविक्रम थापा, बृजलाल यादव, पदमबहादुर बस्नेत, किरण गिरी, आशाराम चौधरीले केन्द्रीय सदस्य पाउने सम्भावना रहेको स्रोतले बतायो।
साउन १० गते थापा सहितको ३१ जनाको समुहले राप्रपाका अध्यक्षत्रयलाई चिठी लेखी राप्रपाबाट अलग भएको घोषणा गरेका थिए। राप्रपाबाट राजिनामा दिएका थापा र नेपाली कांग्रेसका उपसभापति विमलेन्द्र निधिवीच पटक पटक संवाद र छलफल भएको थियो । थापालाई नेपाली कांग्रेसले सहमहामन्त्री पद दिने सहमति भए पछि मात्र उनको समुहले राप्रपाबाट राजिनामा गरेको हो । स्रोतका अनुसार थापालाई पदाधिकारी दिन नेपाली कांग्रेसका सभापति शेरबहादुर देउवाले आश्वासन दिएका थिए।
राप्रपाका अध्यक्षत्रयलाई लेखिएको चिठीमा पार्टीको नीति ढुलमुले भएको र पार्टी एकीकण पछि पनि पार्टीप्रति जनतामा उत्साह नआएको आरोप लगाइएको छ। ‘हामीले यस सन्दर्भमा आफ्ना धारणा निरन्तर राख्दै आयौँ तर नेतृत्व जनमतको प्रतिकुल दिशामा सहभागी भइरहेपछि हामी जनमतको अपमान हुने कार्यमा साथ दिन नसक्ने निस्कर्षमा पुगेका छौँ’चिठीमा भनिएको छ, ‘पार्टीका संस्थापक अध्यक्ष सूर्यबहादुर थापाको निधन पछि पार्टीले सवल नेतृत्व मात्रै गुमाएन, पार्टीको सैद्धान्तिक र वैचारिक मान्यतामा पनि विचलन देखा परेको बताउँदै पार्टी दिशाहिन बनेको छ । स्वार्थ र परिस्थिति अनुकुल विचार सिद्धान्त र दृष्टिकोण परिवर्तन हुँदा राप्रपाप्रति आमरुपमा विश्वास समाप्त भएको मात्र छैन, संस्थापकहरुको सपनामा पनि आघात पुगेको चिठीमा जनाइएको छ। ’
अध्यक्षत्रयलाई चिठी लेखेर पार्टीबाट राजिनामा गर्ने नेताहरुमा विष्णुविक्रम थापा, बाबुराम बस्नेत, बृजलाल यादव, पदमबहादुर बस्नेत, किरण गिरी,दिलिप राइ, आशाराम चौधरी, चन्द्रकुमार घुण्डे गुरुङ,श्रीमती राज्य लक्ष्मी श्रेष्ठ,चतुमान विश्वकर्मा, वीरेन्द्र लाल कर्ण,नारायण राउत,इन्द्र तामाङ छन् । यसैगरी राजकुमार भट्टराइ, डम्मरबहादुर राइ,माधव पौडेल, अर्जुनविक्रम थापा, हरेन्द्र प्रसाद यादव, भिखारी लाल यादवले पनि पार्टीबाट राजिनामा गरेको जनाएका छन् । धनकुटा राप्रपा अध्यक्ष लक्ष्मी सुब्बा सहित धनकुटा राप्रपाका सबै सदस्यहरुले पार्टीबाट राजिनामा गरेको चिठीमा जनाइएको छ।