काठमाडौं। पार्टीको आन्तरिक विवादलाई समाधान गर्ने भन्दै नेकपाका उपाध्यक्ष वामदेव गौतमले सहमतिका लागि अगाडि सारेको ६बुँदे प्रस्तावलाई फिर्ता गर्न निकट नेताहरुले दबाब दिएका छन् ।

अहिलेको अन्तरविरोध समाधान नगर्ने भन्दै निकट नेताहरूले ६ बुदे प्रस्ताव फिर्ता गर्न बुधबार उनी निकट नेताहरुले दबाब दिएका हुन् । बुधबार गौतमनिवास पुगेर केन्द्रीय सदस्यहरू ठाकुर गैरे, रामकुमारी झाँक्री, डा दीपकप्रकाश भट्ट, रविन कोइराला, जीवनराम श्रेष्ठ, सुरेन्द्र मानन्धरलगायतका नेताहरुले सो दबाब दिएको स्रोतले जनाएको छ ।  

‘हामी सबै पार्टी एकता बचाउनुपर्छ र तपाईंले त्यसमा महत्वपूर्ण योगदान पुर्‍याउनुहोस् भन्ने चाहान्छौं, तर तपाईंले ६ बुँदे सहमतिको प्रस्ताव भनेर जे पेस गर्नुभयो, त्यसले अहिले उठिरहेका नीति, विधि र प्रक्रियाका मुद्दा सम्बोधन हुने गरी अन्तरविरोध पनि समाधान गर्दैन, सबैलाई सम्मानजनक अवतरण गर्नका लागि स्पेस पनि दिँदैन,’ गौतम निवास पुगेका एक नेताले भने । उनका अनुसार गौतमले भने विगतमा प्रधानमन्त्री ओलीलाई साथ दिएर धेरै गल्ती गरेको अनुभूति भए पनि पार्टी विभाजन रोक्ने उद्देश्यले बाध्य भएर त्यस्तो प्रस्ताव ल्याएको बताएका थिए । ‘विगतमा केपीजीलाई साथ दिएर मैले जे गरेँ, त्यो ज्यादै गलत कदम थियो । तर, अहिलेको परिस्थितिमा पार्टी विभाजन रोक्नैपर्ने अवस्था देखिएकाले प्रस्ताव अघि सारेको हुँ,’ गौतमले आफूलाई भेट्न आएका नेतालाई जवाफ फर्काएका थिए ।

प्रचण्ड–नेपाल समूहका बहुमत स्थायी कमिटी सदस्यहरूको मंगलबारको बालुवाटार बैठकमा गौतमले प्रस्तुत गरेको ६बुँदे प्रस्तावमा प्रधानमन्त्री र अध्यक्षमा ओलीलाई निरन्तरता दिने उल्लेख छ । त्यस्तै, प्रचण्डले कार्यकारी अध्यक्षका रूपमा काम गर्ने र पार्टी सचिवालयको परामर्श र निर्णयअनुसार सरकारले महत्वपूर्ण निर्णय गर्नेलगायतका विषय समेटिएका छन् ।