अपडेट– उक्त समानान्तरका प्रोजेक्ट म्यानेजर तुलसीप्रसाद भट्टराईले दुई जना कोरोना संक्रमित भारतबाट नभई सर्लाहीबाट भएको जनाएका छन् ।
काठमाडौं । राजधानीमा भएको समानान्तर निर्माण सेवा प्रालिले भारतबाट आएका कामदारलाई पीसीआर परीक्षण नगराई काममा लगाउँदा नेपालीहरुलाई सर्ने खतरा बढेको छ ।
परीक्षण बिना काममा लगाएको केही दिनपछि उनीहरुको रिपोर्ट पोजेटिभ देखिएपछि अहिले नेपाली कामदारहरु चिन्तामा परेका छन् ।
साउन ११ गतेदेखि काममा खटिएका दुई भारतीयमा शुक्रबारमात्र कोरोना देखिएको हो । यसरी संगसंगै काम गर्नेलाई कोरोना देखिएपछि नेपाली कामदार चिन्तित भएका छन् ।
तर कम्पनीले भने नेपालीहरुलाई खुरुखुरु काममा आउन निर्देशन दिएको छ । संगै काम गर्नेलाई कोरोना भएपछि आफूहरुलाई पनि सर्ने भन्दै क्वारेन्टिनमा बस्ने र पीसीआर परीक्षण गराइदिनुपर्छ भन्दासमेत कम्पनीले नमानेको एक पीडितले बताए ।
दवाव दिएपछि सम्भवतः आइतबार गर्छ कि ती पीडितले भने, ‘यस्तो गम्भीर समस्याबीच कम्पनीले खेलबाड गर्यो ।’
साइटको काम भने अहिले रोकिएको छ । ‘तर यस्तो लापरवाही गर्ने कम्पनीलाई कार्वाही केही छैन ?’, पीडितले भने । उनले भारतबाट नेपाल आउँदा पीसीआर नगराई खुलमखुल्ला आउन सरकारले दिएको भन्दै सरकारकै उनले विरोध गरेका छन् ।
