दार्चुला। जिल्लाको मालिकार्जुन गाउँपालिकामा पर्ने उकु आयुर्वेद औषधालय जौलजिवीका पदनाम कविराज निरीक्षक शुभाष झाले विगत ६ महिना देखि घर बसेरै तलब भत्ता बुझ्दै आइरहेको खुल्न आएको छ । जनताले तिरेको करबाट सेवा सुविधा लिइरहेका पदनाम कविराज निरीक्षकलाई सरकारले मालिकार्जुन गाउँपालिकाको जौलजिवीस्थित आयुर्वेद औषधालयमा पठाएको भए पनि उनी गत फागुन ११ गतेदेखि कार्यालयमा हाजिर भएका छैनन् ।

फागुनदेखी हालसम्म कार्यालयमा एकदिन पनि उपस्थित नभएका उनलाई मालिकार्जुन गाउँपालिकाले गत असारसम्मको तलब र स्थानिय भत्ता सबै खुवाई सकेको निमित्त प्रमुख प्रशासकीय अधिकृत जयसिंह धामीले बताए । जौलजिवीको आयुर्वेद औषधालय अहिले कार्यालय सहयोगीको भरमा संचालनमा छ । उक्त कार्यालयको कार्यालय प्रमुखका रुपमा रहेका कविराज निरीक्षक झा विगतदेखि नै विभिन्न बहाना बनाएर घरमै बसी तलब बुझ्ने गरेको समेत खुल्न आएको छ ।

विगत ६ महिनादेखी कार्यालयका प्रमुख झा कार्यालयमा उपस्थित नभएपछि कार्यसम्पादन तथा कार्यालयबाट स्थानियले पाउनुपर्ने सेवा पाइरहेका छैनन् । कोरोना महामारीका बेला स्वास्थ्यकर्मी जस्तो पदमा बसेका कविराज निरीक्षकले आफुलाई कसैले केहि गर्न नसक्ने बताउदै आइरहेको पनि खुल्न आएको छ । कोरोना महामारीका बेला अन्य स्वास्थ्यकर्मीहरु रातदिन नभनेर खटिरहेको अवस्थामा उनी भने आरामले घरमा बसिरहेका छन् ।

पदनाम कविराज निरीक्षक झा विगत ६ महिना देखी कार्यालयमा उपस्थित नभएको तथा कारबाहीको प्रकृयाका बारेमा प्रमुख जिल्ला अधिकारी शरदकुमार पोखरेलले आफुलाई त्यो बारे जानकारी नभएको जनाए । उता कविराज निरीक्षक झाले लकडाउनका कारण यातायातका साधनहरु चल्न नसक्दा घरबाट आउन नसकेको बताएका छन् ।