काठमाडौं । नेपाली कांग्रेसका वरिष्ठ नेता रामचन्द्र पौडेलले कम्युनिष्टहरुसंग प्रतिष्पर्धाका लागि पार्टीको झण्डालाई व्यापारका लागि प्रयोग गर्न रोकेर समाजवादको बहसमा उत्रन आवश्यक रहेको बताएका छन् । 

गणेशनमान सिंहको स्मृति दिवसका अवसरमा प्राध्यापक बहस चौतारीले आयोजना गरेको अर्चुअल कार्यक्रममा वरिष्ठ नेता पौडेलले कांग्रेसले जनतामाझ समाजवादीको खरो व्याख्या गरेर जानुपर्ने बताए । 

उनले पार्टीको लोगो र झण्डालाई व्यापार व्यवसाय गर्नका लागि प्रयोग गर्ने क्रम बढेको बताए । पौडेलले पार्टीका सबैनेता कार्यकर्ताहरुले समाजवादी आचरण र व्यवहार देखाउनुपर्ने बताए । 

आउँदो चुनाव जित्नका लागि कांग्रेसलाई समाजवादमा खरो उतार्नु आवश्यक भएको भन्दै अब  राजनीति जोडघटाउबाट राजनीति चलाउने होइन सिद्धान्तको राजनीति आवश्यक भइसकेको बताए । 

पौडेलले भने, ‘कम्युनिष्टसंग हामी खरो रुपमा बहसमा उत्रनुपर्छ । हाम्रो समाजवाद भनेको हो । राष्ट्रियता यो हो लोकतन्त्रप्रतिको आस्था यो हो । कम्युनिष्टहरुलाई सिद्धानतको बहसमा उतार्न सक्नुपर्छ । कम्युनिष्टहरुको विचार के हो । उनीहरुले अझै पनि झुट बोलिरहेका छन् ।’

पौडेलले कम्युनिष्टलाई सिद्धान्तको बहसमा उत्रार्न सकेमात्र कांग्रेसको जित हुने बताए । उनले भने, ‘सिद्धान्तको लडाई नथाले कम्युनिष्टसंग प्रतिष्पर्धामा उत्रनै सकिँदैन । 

उनीहरुसंग पैसा राज्यसत्ता सबै छ अब कम्युनिष्टलाई परास्त गर्न सकिदैन । पूँजीपति रिसाउँछ कि भनेर मोजाहिल्ला नगरी जनताले बुझ्ने भाषामा समाजवादको व्याख्या गर्नुपर्ने पौडेलको भनाई थियो । 

पौडेलले भने, ‘कांग्रेसको समाजवाद भनेको गरिबको हितका लागि हो, दलितको पक्षमा हो, श्रमिकको साथी समाजवाद हो, किसानको विचार समाजवाद हो ।’

वरिष्ठ नेता पौडेलले गरिबको हित सुरक्षा नगरी पूँजीपतिको सुरक्षा हुँदैन भन्ने विश्वास पूँजीपतिलाई दिलाउनुपर्ने बताउँदै गाउँको विकासले शहरको व्यापार बढ्ने विश्वास दिलाउनुपर्ने बताए । उनले समाजवाद भनेको मान्छेलाई मान्छेको रुपमा हेर्ने दृष्टीकोण भएको पनि बताए ।  

कार्यक्रममा प्राध्यापक डा. गोविन्दमान सिंह कार्कीले कार्यपत्र पेश गरेका थिए । सो कार्यपत्रमाथि नेपाल पत्रकार महासंघका पूर्व सभापति सभापति धर्मेन्द्र झाले टिप्पणी गरेका थिए ।