काठमाडौं । युएईमा जारी १३ औं संस्करणको इन्डियन प्रिमियर लिग (आईपीएली टी–२० क्रिकेटमा दिल्ली क्यापिटल्सको जितमा पूर्णविराम लागेको छ । अबुधाबीमा मंगलबार राति भएको खेलमा दिल्ली क्यापिटल्स सनराइजर्स हैदराबादसँग पराजित भएको हो ।
शेख जायद स्टेडियममा हैदराबाद १५ रनले विजयी भएको हो । हैदराबादले दिएको १ सय ६३ रनको लक्ष्य पछ्याएको दिल्लीले ७ विकेटको नोक्सानीमा १ सय ४७ रन मात्र बनाउन सक्यो ।
दिल्लीका शिखर धवनले ३४ तथा ऋषब पन्तले ३२ रन बनाए । दिल्लीलाई सस्तैमा समेट्न राशिद खानले ३ तथा भुवनेश्वर कुमारले २ विकेट लिए ।
यसअघि टस हारेर पहिले ब्याटिङ गरेको हैदराबादले ४ विकेटको नोक्सानीमा १ सय ६२ रन बनाएको थियो । जोनी बेयरस्ट्रोले ४८ बलमा ५३ रन बनाए । कप्तान डेभिड वार्नरले ४५ तथा विलियम्सनले ४१ रन बनाए ।
दिल्लीका अमित मिश्रा र कागिसो राबडाले २–२ विकेट लिए ।
जितसँगै हैदराबादले ३ खेलमा २ अंक जोडेको छ । पहिलो जित निकालेको हैदराबाद छैटौं स्थानमा उक्लेको छ । यसअघिका खेलमा हैदराबाद रोयल च्यालेन्जर्स बैंगलोरसँग १० रनले तथा कोलकत्ता नाइट राइडर्ससँग ७ विकेटले पराजित भएको थियो ।
यसअघि किंगस इलाभेन पंजाब र चेन्नई सुपर किंगसलाई हराएको दिल्लीले हैदराबाद सामु घुँडा टेकेको हो ।
पाएनन् खेल्न सन्दीप लामिछाने
नेपाली लेग स्पिनर सन्दीप लामिछाने यो खेलमा पनि खेल्न पाएनन् । लगातार तेस्रो खेलमा उनी खेल्न नपाएका हुन् । उनले अबको खेलमा खेल्ने आश गर्न सकिन्छ ।
तेस्रो पटक खेल्दै गरेका सन्दीपले पहिलो पटक जम्मा ३ खेल र दोस्रो पटक ६ खेल खेलेका थिए ।
अंक तालिका
पहिलो हारले दिल्ली ४ अंकबाट दोस्रो स्थानमा झरेको छ । राजस्थान रोयल्समात्र अपराजित टिम बनेको छ । राजस्थानको २ खेलबाट ४ अंक छ ।
रोयल च्यालेन्जर्स बैंगलोरको पनि ३ खेलबाट ४ अंक छ । बाँकी सबै टिमको २ अंक छ ।
बुधबारको खेल
बुधबार राजस्थानले कोलकाता नाइट राइडर्ससँग खेल्दैछ ।
खेल दुबाई इन्टरनेशनल क्रिकेट स्टेडियममा हुँदैछ ।
खेल नेपाली समय अनुसार बेलुकी ७ः४५ बजे सुरु हुनेछ ।
