ओखलढुंगा । ओखलढुंगाको मोलुङ खोलामा मोलुङ हाइड्रोपावर कम्पनीद्धारा सञ्चालित ७ मेगावाट क्षमताको मोलुङ हाइड्रोपावरले आफ्नो क्षमताको शतप्रतिशत विद्युत उत्पादन गर्न नसकेको विद्युत उत्पादन कम्पनीले जनाएको छ । 

ओखलढुंगा–बुइपा ३३ केबी प्रशारण लाइनमा बारम्बार आउने समस्या र विद्युत उत्पादन भैरहेको खोलामा सर्वे गर्ने बेला भन्दा हाल बर्षायामको समय बाहेकको समयमा पानीको मात्रा निकै घटेकाले शतप्रतिशत विद्युत उत्पादन गर्न नसकिएको मोलुङ हाइड्रोपावर कम्पनीका सञ्चालक नविन महर्जनले बताए ।

ओखलढुंगा ड्डबुइपा र बुइपाड्डजलजले प्रशारण लाइनमा बारम्बार रुख र बाँसका पातले तारमा छुने र यसरी प्रशारण लाइनको तारमा बोट बिरुवाले छोएको बखत विद्युतगृहमा ट्रिप खान पुगी विद्युत उत्पादन बन्द हुने कम्पनीले जनाएको छ । 

२०७४ साल चैत १२ गतेबाट विद्युत उत्पादन सुरु गरेको विद्युत कम्पनीले आर्थिक बर्ष ७४–७५ मा ४३ प्रतिशत, ७५–७६ मा ५८ प्रतिशत र ७६–७७ मा ७०.५ प्रतिशत मात्रै विद्युत उत्पादन गरेको मोलुङ हाइड्रोपावर कम्पनीका आयोजना प्रमुख सुवास चन्द्र झाले बताए ।
 
कम्पनीले कुल उत्पादन क्षमताको सतप्रतिशत विद्युत उत्पादन गर्न नसक्दा आर्थिक बर्ष ७४–७५ मा ३ करोड २५ लाख ९१ हजार ५ सय, ७५–७६ मा २ करोड २८ लाख ६१ हजार ८ सय र ७६–७७ मा २५ लाख २८ हजार गरी हालसम्ममा ५ करोड ७६ लाख ८१ हजार ३ सय रुपैयाँ बराबरको नोक्सान कम्पनीलाई भएको आयोजना प्रमुख झाले बताए । 

कुल १ अर्ब ४५ लाखमा निर्माण सम्पन्न भएको मोलुङ हाइड्रोपावरमा ४ वटा बैंकको १ अर्ब ३ करोड ऋण लगानी रहेको कम्पनीले जनाएको छ । 

विद्युत उत्पादनमा ह्रास आएकोले कम्पनीले बैंकको ब्याज मात्रै तिर्न सकिएको र कम्पनीले नाफा कमाउन नसक्दा स्थानीय शेयर लगानीकर्ताहरुलाई लाभांश दिन नसकिएको कम्पनीले जनाएको छ ।

विद्युत प्राधिकरण ओखलढुंगाका प्रमुख संजिब शाहले ओखलढुंगा ड्डबुइपा र बुइपाड्डजलजले प्रशारण लाइनको अधिकांश भाग जङगलमा पर्ने भएकाले विद्युत लाइनमा रुख बिरुवाले छुने समस्या रहेको र लाइनमा रहेका रुखहरु चाँडै हटाउने योजना रहेको बताए । 

यसैगरी एक सय बत्तिस केबी क्षमताको प्रसारण लाइन निर्माणको क्रममा रहेको र उक्त प्रशारण लाइन बिस्तार सम्पन्न भएपछि ३३ केबी प्रसारण लाइनमा देखिएको समस्या समाधान हुनेसमेत प्रमुख शाहले बताए ।