सर्वसाधारणलाई लुट्दै वडाहरु, हकदार सिफारिसको १५ सय
लोकेन्द्र बिश्वकर्मा,
प्रकाशित २०७७ कार्तिक २४ सोमबार
24
Shares
जाजरकोट । जाजरकोट जिल्लाको छेडागाड नगरपालिका वडा नं ११ झाप्राले सिफारिसबाट चर्काे शुल्क उठाएको खुलासा भएको छ । २०७७ साल कार्तिक मात्र राखेर गतेसमेत नराखी दिइएको बिलमा वडाले स्थानीय विष्णु खड्कालाई हकदार सिफारिस दिँदा एक हजार पाँच सय रुपैयाँ असुली गरेको हो ।
सामान्यतया गाउँपालिका, नगरपालिकाले हकदारको सिफारिस लिन २५० देखि ५०० रुपैयाँ सम्मको व्यवस्था स्थानीय निकायहरुले गर्दै आए पनि ११ नम्बर वडा झाप्राले चर्का शुल्क असुली गर्दै आएको हो ।
सम्बन्धित निकाय, जिल्ला प्रशासन कार्यालय लगायत भने यसबारे बेखवर बनेका छन् ।
गाउँगाउँमा सिंहदरबार होइन शोषक दरबार आएको स्थानीयको गुनासो रहेको छ । एक स्थानीयले भने, ‘यो नगरको एउटा नमुना मात्र हो, नगरपालिकामा यस्ता थुप्रै कार्यहरु भइरहेका छन् ।
सामाजिक संजालमा आक्रोश
यस्ता गतिविधिका कारण सामाजिक संजालहरुमा भने चर्को विरोध भइरहेको छ । फेसबुकमा ललित बस्नेत लेख्छन्, ‘लुटिखाने ठाउँ हो या जनताको हकहित ।’
यस्तै दिपेश ओली लेख्छन्, ‘वडाहरु या लुट्ने ब्यवसायी ।’ क. रिजार्ट लेख्छन्, ‘अब लुटेरै सक्ने भए ।’
