काठमाडौं । विश्व हिन्दू परिषद नेपालको आयोजनामा गुरुनानक देवजीको ५५१ औं जयंती मनाइएको छ । सोमबार सप्तरी लगायतका विभिन्न जिल्लाहरुमा परिषदका स्थानीय कार्यकर्ताहरुले कार्यक्रम आयोजना गरेका थिए ।
विश्व हिन्दू परिषद नेपालले प्रत्येक वर्ष गुरुनानक देवजीको जयन्तीको अवसरमा देशभर कार्यक्रमहरु आयोजना गरी भव्यताका साथ मनाउने गर्छ । ओमकार परिवारभित्र कै सिख धर्म पनि भएको हुनाले परिषदले प्रत्येक वर्ष गुरुनानक देवजीको जयन्ती मनाउने गर्छ ।
कार्यक्रममा परिषदका वक्ताहरुले गुरुनानक देवजीको जीवनी एवं समाजमा उनले पुर्याएको योगदानबारे प्रकाश पारेका थिए । विश्व हिन्दू परिषद नेपालले ओमकार परिवार भित्रका बौद्ध, सिख, जैन, किराँत आदि पन्थका कार्यक्रमहरु बडो हर्षोल्लासका साथ मनाउने गर्दछ ।
यस किसिमको कार्यक्रमहरुले सनातन धर्मावलम्बीहरुलाई एकताको सूत्रमा बाँध्ने विश्व हिन्दू परिषद् नेपालको विश्वास रहेको परिषदका एक अधिकारीले बताए ।
