काठमाडौं । एथ्लेटिको मड्रिडले यो सिजनको स्पेनिश लिग ला लिगा फुटबलको उपाधि जित्ने संकेत ल्याएको छ । एथ्लेटिकोले जितसँगै सन् २०२० को बिदाई गर्दा अंकको अन्तर पनि बढी नै राखेको छ ।
लुइस सुआरेज बार्सिलोनाबाट एथ्लेटिको गएपछि एकाएक एथ्लेटिकोलाई उपाधिको दावेदार मानिएको छ । उसले राम्रो प्रदर्शन गर्दै आएको छ । बुधबार राति घरेलु मैदानमा उसले गेटाफेलाई १–० गोल अन्तरले हरायो ।
लुईस सुआरेजले विजयी गोल गरे । उनले खेलको २० औं मिनेटमा हेडमार्फत घरेलु टोलीका लागि विजयी गोल गरेका हुन् ।
यो खेलमा प्रशिक्षक डिएगो सिमोनले रेकर्ड राखेका छन् । उनले एथ्लेटिकोबाट ५ सय खेल पूरा गरेका हुन् । सिमोन सन् २०१४ पछि पहिलो पटक लिग उपाधिको दौडमा अघि देखिएका छन् । उनले क्लबबाट ३ सय १ खेलमा जित हासिल गरेका छन् ।
अन्य खेलको नतिजा
सेल्टाभिगो २–१ हुएस्का
इल्चे १–१ रियाल मड्रिड
अंक तालिका
शीर्ष स्थानको एथ्लेटिकोको १४ खेलबाट ३५ अंक भएको छ । दोस्रो स्थानको रियाल मड्रिडको १६ खेलबाट ३३ अंक छ ।
तेस्रो स्थानको रियाल सोसिडाडको १६ खेलबाट २६ अंक छ ।
