काठमाडौँ। केपी ओलीलाई साथ दिएको जनता समाजवादी पार्टीको महन्थ ठाकुर–राजेन्द्र महतो पक्ष सरकारमा जाने पक्का भएको छ ।

ठाकुरले आफूहरू सरकारमा जाने निर्णयको जानकारी प्रधानमन्त्री ओलीलाई गराइसकेको स्रोतको भनाइ छ । तर सरकारमा जान ठाकुर पक्षका एक दर्जन सांसद तथा केही गैर सांसदले समेत आकाक्षा देखाएका छन् । संसद् विघटन भएकोले गैर सांसदलाई पनि मन्त्री बनाउन प्रधानमन्त्रीलाई छुट छ । 

जसपा स्रोतका अनुसार ठाकुरले प्रधानमन्त्रीसँग १० वटा मन्त्रालय मागेका छन् । स्रोत भन्छ, प्रधानमन्त्री जसपालाई ८ वटा मन्त्रालय दिन तयार भएका छन् । 

जसपाले प्रधानमन्त्रीसँग गृह मागेको छ । जसपाले गृह पायो भने उपप्रधानमन्त्री सहित गृहमा जान राजेन्द्र महतोले इच्छा देखाएका छन् । जसपाबाट नेतृत्व गर्दै महतो सरकारमा जाने करिब करिब निश्चित भएको जसपा स्रोतको भनाइ छ । 

ठाकुर पक्षले महतोलाई संसदीय दलको नेता चयन गरेको छ । यसबाट पार्टीको नेतृत्व गर्दै सरकारमा जान महतोलाई झन् सहज बनेको हो । प्रधानमन्त्रीले जसपालाई एउटा उपप्रधानमन्त्री समेत दिन तयार भएको स्रोतले बतायो । 

सरकारमा जान शरत्सिंह भण्डारी,अनिल झा र राज किशोर यादवले पनि इच्छा देखाएका छन् । भण्डारी,झा र यादव पूर्व राष्ट्रिय जनता पार्टीका अध्यक्ष मण्डलका सदस्य समेत भएकाले उनीहरू सरकारमा जाने प्रबल सम्भावना रहेको स्रोतले बतायो । 

ठाकुर आफैँ भने सरकारमा जाने छैनन् । उनले आफ्नो तर्फबाट दुई जनालाई सरकारमा पठाउन चाहेको स्रोतको भनाइ छ । आफ्ना सम्धी उमाकान्त झा र चन्दा चौधरीलाई ठाकुरले सरकारमा पठाउन चाहेका छन्। ठाकुरकै सिफारिसमा उमाकान्तलाई तत्कालीन शेरबहादुर देउवा सरकारले प्रदेश ५को प्रदेश प्रमुख बनाएको थियो । खिलराज रेग्मी नेतृत्वको सरकारमा झा सिचाइ मन्त्री पनि भएका थिए । त्यस बेला पनि उनी ठाकुरको  सिफारिसमा मन्त्री भएका थिए । 

ठाकुर निकट नेता इकबाल साह र सर्बेन्द्रनाथ शुक्लले पनि मन्त्री हुने इच्छा देखाएका छन् । शुक्ल सरकारसँग वार्ता गर्न गठन गरिएको कार्यदलका सदस्य पनि हुन् । ठाकुरकै कोटाबाट सरकारमा जान साह र शुक्लले प्रयास गरेका छन् । कार्यदलमा रहेका अर्का सदस्य लक्ष्मणलाल कर्ण पनि यस पटक मन्त्री हुन चाहेका छन् । सरकारमा गए भने उनी महतो कोटाबाट जानेछन् ।  

मन्त्री हुनकै लागि उपेन्द्र यादव पक्षका केही सांसदहरु कित्ता परिवर्तन गरी ठाकुर–महतो कित्तामा गएका छन् । केही दिन अघि मात्र रेणुका गुरुङ, कल्लुदेबी विश्वकर्मा र रुहीनाथले कित्ता परिवर्तन गरी ठाकुर कित्तामा गएका छन् । यसअघि, उमाशङ्कर अरगरैया र विमल श्रीवास्तवले कित्ता परिवर्तन गरी ठाकुर— महतो कित्तामा गएका छन् । कित्ता परिवर्तन गरेकाहरूलाई मन्त्री कोलागि सिफारिस गर्नुपर्ने दबाब ठाकुर महतो पक्षलाई छ । 

कित्ता परिवर्तन गरेका ५ सांसद मध्ये अरगैयरा र श्रीवास्तवलाई ठाकुरले मन्त्रीमा पठाउने सम्भावना प्रबल रहेको स्रोतले बतायो । स्रोतले भन्यो,‘सरकारमा जान आवश्यकभन्दा धेरै नेताले इच्छा देखाउनु भएकोले पनि मिलाउन गाह्रो भएको छ ।’ सरकारमा जाने नेताहरूको सूचि तयार हुने बित्तिकै प्रधानमन्त्रीलाई पठाइने जसपा स्रोतले बतायो । 

ठाकुर महतो पक्षका नेता अरगरैयाले जसपाले राखेका माग सरकारले पूरा गर्न लागेको र केही माग पूरा गरेकोले आफूहरू सरकारमा जाने प्रबल सम्भावना रहेको बताए । तर सरकारमा जाने दिन भने अझै तय नभएको उनले जनाए । स्रोतका अनुसार आज भोलि नै सरकारमा जान ठाकुर—महतो पक्षका नेताहरूले चासो देखाएका छन् । 

ठाकुर महतो पक्षका नेताहरू सरकारमा जान लागेको थाहा पाएर उपेन्द्र यादव पक्षले आइतबार कार्यकारिणी समितिको बैठक गरी सरकारमा जाने बित्तिकै पार्टीबाट स्वतः निकाल्ने निर्णय गरेको छ । उपेन्द्र यादव पक्षको यस्तो निर्णयबाट आफूहरू सरकारमा जाने सोचमा कुनै फेरबदल नभएको ठाकुर —महतो पक्षका नेताहरू बत्ताउँछन् ।