बलुचिस्तान। कोरोना महामारीको दोस्रो लहरले पाकिस्तानलाई पनि आक्रान्त बनाएको छ । पाकिस्तानमा हालसम्म कोरोना भाइरस सङ्क्रमितको सङ्ख्या आठ लाख ७५ हजार पुगेको छ भने १९ हजार ४ सयभन्दा बढीको मृत्यु भइसकेको छ । 

यसमा पनि स्रोत साधन निकै कम भएको पाकिस्तानको बलुचिस्तान प्रान्त बढी प्रभावित भएको छ । कोरोना भाइरस सङ्क्रमितको सङ्ख्या दैनिक वृद्धि हुँदै गएपछि स्वास्थ्य प्रणालीले थेग्न नसक्ने अवस्था सिर्जना भएको छ । यस्तो अवस्थामा बलुचिस्तानका प्रान्तीय स्वास्थ्य सचिवले निजी अस्पतालका मालिकहरूलाई आईससीयूको सङ्ख्यामा वृद्धि गर्न आग्रह गरेका छन् । 

यससँगै अस्पतालहरूमा अक्सिजनको नियमित आपूर्तिको व्यवस्था गर्नसमेत सरकारलाई स्वास्थ्य अधिकारीहरूले आग्रह गरेका छन् । पाकिस्तानमा पछिल्लो २४ घण्टामा करिब दुई हजार कोरोना भाइरस सङ्क्रमित थपिएका छन् । 

मे ३ देखि पाकिस्तानमा कोरोना भाइरसविरुद्धको खोप लगाउनका सहजताका लागि दुई वटा मोबाइल एकाइहरू सुरु गरिएको छ । वृद्धहरूले उनीहरूको राष्ट्रिय परिचयपत्रसहित यी मोबाइल इकाईहरूमा गएर आफूलाई खोप लगाउन पाउने बताइएको छ ।

स्वास्थ्य अधिकारीहरूले निजी अस्पतालका मालिकहरूलाई आईसीयू, एचडीयू र बेडको सङ्ख्या बढाउन र अक्सिजनको नियमित आपूर्ति सुनिश्चित गर्न तथा अक्सिजन प्लान्ट स्थापना गर्न आग्रह गरेका हुन् । 

उनीहरूले निजी अस्पतालका मालिकहरूलाई नियमित रूपमा बिरामी, बेड र भ्यान्टिलेटरहरूको सङ्ख्याबारे सरकारलाई अपडेट गराउन पनि निर्देशन दिएका छन् । 

यसैबिच विश्व स्वास्थ्य सङ्गठनले सोमबार स्वास्थ्य विभागको प्रयोगका लागि एम्बुलेन्स र मोटरसाइकल प्रान्तीय सरकारलाई हस्तान्तरण गरेको छ । पाकिस्तानमा कोरोनाविरुद्धको चिनियाँ खोप लगाइँदै आएको छ । यो खोप लगाएपछि प्रधानमन्त्री इमरान खानलाई कोरोना सङ्क्रमण पुष्टि भएको थियो।